Незаконски отказ на Претседателот на Синдикатот за угостителство и туризам (СУТ)

0

Синдикат за угостителство и туризам (СУТ) при КСС реагира на решението на Трудовиот инспекторат како крајно тенденциозно, политичко мотивирано и со непочитување на Законот за работни односи.

Зошто сметаме дека тоа е така? Имено при претставка од синдикатот за незаконско отказно решение на Претседателот на СУТ кој што е заштитен согласно ЗРО, член 200, работодавачот носи решение каде што го прекршува Законот и му доделува отказ, а во истото решение констатира дека е направен состанок/консултација со претставникот на вработените.

Согласно позитивните законски прописи на РМ, Решението од Централен Регистар е единствено легално и легитимно, законски документ каде стои дека законски синдикален претставник е лицето Роберт Митровски кому му е даден отказ.

Инспекторатот игнорирајќи законски легитимен документ прави упад и укажува дека е направен состанок со претставник на вработените игнорирајќи документ издаден од Централен Регистар на РМ.

Хаосот станува уште поголем, кога синдикалниот претставник треба да се пријави во АВРМ за надоместок во случај на невработеност, од каде добива одговор дека не може да го стори тоа бидејќи тој е синдикален претставник.

Па оттука прашуваме кој е во право, работодавачот што го игнорира законот и трудовиот инспектор кој го легализира кршењето на законот во делот на член 200 од ЗРО или АВРМ и Централниот регистар? Тука станува збор дека некој направил кривично дело, па затоа го повикуваме Јавното Обвинителство итно да изврши увид и покрене соодветна постапка за сторено кривично дело.

Сето ова јасно покажува како работодавачите во тесна соработка со Власта се пресметуваат со синдикалните лидери со цел згаснување на синдикалните активности и рушење на работничките права.

Во овој случај Претседателот на грански синдикат при Конфедерација на слободни синдикати на Македонија, кој треба да биде заштитен и од Трудов инспекторат според ЗРО и конвенциите на МОТ како и Министерство за труд и социјална политика кое промовира решавање на работни спорови, а во суштина спроведува незаконски и кривични дела не е заштитен од ниту една институција.

Се додека системот се однесува на ваков дискриминирачки, незаконски и агресивен начин кон работниците, особено кон синдикалните лидери ние во Македонија ниту ќе имаме прогрес, интегритет, а најмалку демократија за која и се стремиме.

Синдикатот за угостителство и туризам преку КСС ќе ги информира сите меѓународни пријатели и соработници со кои се во сојуз и имаат целосно почитувачки и професионален однос и нема да сноси никаква одговорност за непочитување и поништување на законите и демократијата од погоре наведените институции.

Можеме да кажеме дека на овој Ваш безкорпулозен чин со кој имате намера да ги замолчите синдикалните организации во Македонија ќе одговориме со синдикални легитимни мерки, солидарност на дело, доколку разбирате.

 

Сподели на социјални медиуми

Copyright kss.mk